Disa e nisën në postë, disa në shitje, disa në restorante, ndërsa disa të tjerë filluan bizneset e tyre të para që në adoleshencë. Para kompanive të mëdha, avionëve privatë dhe miliardave, ata kishin punë krejt të zakonshme ,ose paksa të pazakonta.
Giorgio Armani
Puna e parë: Asistent fotografi
Viti: 1957
Pagesa për orë: 1,38 dollarë
Para se mbiemri i tij të bëhej sinonim i modës luksoze, Armani kreu shërbimin ushtarak në Itali. Gjatë një pushimi në Milano, një mik i ofroi punë si asistent fotografi në një dyqan. Armani e pranoi dhe kështu hodhi hapin e parë drejt botës së modës. Më vonë, ai u punësua në dyqanin e famshëm milanez La Rinascente, ku filloi karriera e tij më serioze në dizajn.
Mësimi: Ndonjëherë karrierat fillojnë me një moment të rastësishëm: „A mund të më ndihmosh?“
Travis Kalanick
Puna e parë: Shitës derë më derë
Viti: 1998
Pagesa për orë: 10,26 dollarë
Themeluesi i Uber-it shiste thika derë më derë për kompaninë Cutco kur ishte adoleshent. Në moshën 18-vjeçare, ai filloi biznesin e tij, kurse për përgatitjen e testit SAT. Më vonë u regjistrua për inxhinieri kompjuterike në UCLA, por e ndërpreu studimet dhe iu përkushtua kompanive teknologjike.
Mësimi: Shitja mund të jetë një nga shkollat më të mira për sipërmarrjen.
Ted Turner
Puna e parë: Punë në agjencinë reklamuese të babait të tij
Viti: 1960
Pagesa: 6.541 dollarë në vit
Themeluesi i CNN nuk filloi si manjat i medias, por në biznesin familjar. Pasi u përjashtua nga Universiteti Brown, Turner filloi të punonte në agjencinë reklamuese të babait të tij. Që gjatë vitit të parë të punës, ai arriti t’i rriste të ardhurat e zyrës më shumë se dyfish. Më vonë mori drejtimin e kompanisë dhe e shiti atë te Time Warner për 7,5 miliardë dollarë.
Mësimi: Biznesi familjar mund të jetë një pikënisje, por rezultati varet nga ajo që bëni me të.
Jack Dorsey
Puna e parë: Zhvillues softuerësh
Viti: 1991
Pagesa: Rreth 44.971 dollarë në vit
Dorsey filloi të programonte që në adoleshencë. Në moshën vetëm 15-vjeçare, ai krijoi softuer për sistemet e dispeçerimit të kompanive të taksive dhe shërbimeve të dërgesave. Prandaj, puna e tij e parë në fushën e softuerit nuk ishte ndonjë surprizë e madhe. Më vonë ai bashkëthemeloi Twitter dhe Square.
Mësimi: Nëse filloni mjaftueshëm herët, mund të grumbulloni vite përvoje përpara se të merrni punën tuaj të parë serioze.
Richard Branson
Puna e parë: Botues reviste
Viti: 1966
Të ardhurat: Nuk janë specifikuar
Branson nuk priti që dikush t’i ofronte punën e parë. Në moshën 16-vjeçare, ai la shkollën dhe filloi revistën Student, e cila u drejtohej të rinjve dhe krijohej së bashku me ta. Numri i parë solli rreth 8.000 dollarë të ardhura nga reklamat – mjaftueshëm për të mbuluar shtypjen e 50.000 kopjeve. Për ta financuar revistën, Branson filloi të shiste disqe muzikore me postë. Ky biznes më vonë do të shndërrohej në Virgin Records dhe, më pas, në të gjithë perandorinë e biznesit Virgin.
Mësimi: Puna juaj e parë mund të jetë ajo që krijoni vetë.
Jeff Bezos
Puna e parë: Punonjës në McDonald’s
Periudha: Vitet 1980
Pagesa për orë: 2,69 dollarë
Para Amazon-it, Bezos punonte gjatë verës në McDonald’s. Një ditë, dispenseri i madh i ketchup-it u prish dhe një sasi e madhe ketchup-i përfundoi në të gjithë kuzhinën, përfshirë edhe vendet që ishin të vështira për t’u arritur. Një punonjësi të ri, me emrin Bezos, iu dha detyra ta pastronte gjithçka. Më vonë ai ka folur për këtë si një mësim mbi organizimin, përgjegjësinë dhe zgjidhjen e problemeve.
Mësimi: Disa nga mësimet më të dobishme të biznesit fillojnë aty ku askush nuk dëshiron të pastrojë.
Warren Buffett
Puna e parë: Shpërndarës gazetash
Viti: 1944
Të ardhurat: 175 dollarë në muaj
Si adoleshent, Buffett shpërndante gazeta për The Washington Post. Ai nuk i shpenzonte thjesht paratë që fitonte – i kursente dhe i investonte. Në moshën 15-vjeçare, ai kishte arritur të kursente rreth 2.000 dollarë dhe një pjesë të tyre e investoi në tokë bujqësore. Pra, interesi i tij për investimet nuk filloi në zyrat e Berkshire Hathaway, por shumë më herët – mes shpërndarjes së gazetave në mëngjes dhe kursimeve të para serioze.
Mësimi: Për një investitor, më e rëndësishme se sa është fitimi i parë është ajo që bëni me të.
Mark Zuckerberg
Puna e parë: Programues
Viti: 2006
Të ardhurat: 0 dollarë
Që në shkollën e mesme, Zuckerberg krijoi një softuer për rekomandime muzikore të quajtur Synapse. Kompani si Microsoft dhe AOL ishin të interesuara për produktin dhe i ofruan punë, por Zuckerberg vendosi të vazhdonte studimet në Harvard. Disa vite më vonë, Facebook ishte tashmë një nga historitë më të mëdha të teknologjisë në botë.
Mësimi: Ndonjëherë vendimi më i kushtueshëm është ai që zgjidhni të mos e monetizoni menjëherë.
Mark Cuban
Puna e parë: Shitës derë më derë
Mosha: 12 vjeç
Produkti: Qese plehrash
Në moshën vetëm 12-vjeçare, Mark Cuban shkonte derë më derë duke shitur qese plehrash për të fituar para për një palë atlete basketbolli. Logjika e tij ishte e thjeshtë: kush do ta refuzonte një fëmijë që shiste diçka që i nevojitej gjithkujt? Më vonë, Cuban e përmendi pikërisht këtë përvojë si një nga mësimet e tij të para mbi shitjen dhe sipërmarrjen.
Mësimi: Nëse mund të shisni qese plehrash, me shumë gjasë mund të shisni pothuajse gjithçka.
Elon Musk
Puna e parë: Shitja e videolojës së tij
Viti: 1983
Të ardhurat: 500 dollarë
Musk ishte vetëm 12 vjeç kur krijoi Blastar, një videolojë hapësinore për kompjuter. Ai ia shiti kodin e lojës një reviste për 500 dollarë. Nuk kishte ekip, zyrë apo investitorë. Kishte një kompjuter, një ide dhe njohuritë e nevojshme për ta krijuar vetë. Dekada më vonë, bizneset e tij do të përqendroheshin në automjete elektrike, fluturime hapësinore dhe inteligjencë artificiale.
Mësimi: Produkti i parë nuk ka pse të jetë i madh. E rëndësishme është të ketë dikush që është i gatshëm të paguajë për të.
Përgatiti dhe përmblodhi:
WWW.STUDENTET.MK
