Themeluesi i Amazonit, Jeff Bezos, shprehu një pikëpamje optimiste për të ardhmen e inteligjencës artificiale, duke thënë se AI mund të çojë në mungesë të fuqisë punëtore, e jo në papunësi masive, siç kanë frikë shumë njerëz.
Duke folur në konferencën VivaTech në Paris, Bezos hodhi poshtë shqetësimet në rritje se inteligjenca artificiale do të zëvendësojë një numër të madh punonjësish dhe do t’i bëjë njerëzit të panevojshëm në ekonomi.
“E di që ekziston një shqetësim i madh, madje edhe mes shumë njerëzve inteligjentë, se inteligjenca artificiale do t’i bëjë njerëzit teknologjikisht të tepërt. Unë nuk pajtohem aspak me këtë,” tha Bezos.
Ai theksoi se, sipas tij, inteligjenca artificiale do të hapë mundësi të reja dhe do të rrisë kërkesën për njerëz që mund t’i shndërrojnë idetë në projekte dhe produkte konkrete.
“Inteligjenca artificiale në fakt do të krijojë mungesë të fuqisë punëtore,” shtoi ai.
Sipas raportimit të Business Insider, Bezos tha se bota ka një potencial të jashtëzakonshëm idesh, por ato shpesh mbeten të parealizuara për shkak të kufizimeve në burime dhe në aftësinë për t’i zbatuar.
“Jam i sigurt se secili në këtë sallë ka pasur një ide për një produkt ose biznes të ri, por ajo nuk është realizuar kurrë sepse ka qenë shumë e vështirë.”
Sipas tij, problemi kryesor nuk është mungesa e ideve, por aftësia për t’i vënë ato në praktikë.
“Nëse e përshpejtojmë procesin e shndërrimit të ideve në realitet, atëherë gjithçka bëhet e mundur.”
Bezos beson se inteligjenca artificiale mund të përshpejtojë inovacionin dhe të krijojë industri krejtësisht të reja, veçanërisht në fushat e prodhimit, teknologjisë dhe sipërmarrjes. Ai mendon se AI do t’i ndihmojë njerëzit t’i “ndërtojnë” më lehtë idetë e tyre, gjë që do të rrisë kërkesën për punëtorë në sektorë të rinj.
Duke folur për të ardhmen afatgjatë, Bezos deklaroi se zhvillimi i teknologjisë mund të mundësojë zgjerimin e industrisë përtej Tokës. Në atë skenar, nxjerrja e mineraleve nga asteroidët dhe shfrytëzimi i burimeve të Hënës dhe trupave të tjerë qiellorë mund të zvogëlojnë barrën industriale mbi Tokën.
“Nëse udhëtimi në hapësirë bëhet mjaftueshëm i sigurt dhe i lirë, ne mund ta zhvendosim industrinë e rëndë në hapësirë dhe ta kthejmë Tokën në gjendjen e saj para Revolucionit Industrial.”
Bezos nuk është i vetmi që imagjinon një të ardhme përtej Tokës. Elon Musk ka folur më parë për një botë ku njerëzit jetojnë në Hënë dhe në Mars, ndërsa hapësira strehon qendra të të dhënave dhe industri të reja, dhe udhëtimet drejt Hënës bëhen të zakonshme.
Përgatiti dhe përshtati:
WWW.STUDENTËT.MK
