Niraj Shah, drejtor ekzekutiv i shitësit amerikan online të produkteve për shtëpi “Wayfair”, beson se kur mendoni të jepni dorëheqjen nga puna, nuk duhet të rrezikoni pa iu përgjigjur dy pyetjeve.
Kjo vlen veçanërisht për ata që kanë ndërmend të japin dorëheqjen për të filluar biznesin e tyre. Shah, në podcastin “How I Built This”, tha se të gjithë ata që duan të bëhen sipërmarrës duhet të jenë të kujdesshëm kur mendojnë të lënë punën, sidomos nëse kanë një punë të qëndrueshme me orar të plotë.
Ai kujtoi se ideja për të qenë shef dhe për të krijuar një biznes të suksesshëm mund të jetë shumë joshëse, por është një angazhim i madh pa asnjë garancion për sukses. Prandaj, këshilla e tij është të krijoni atë që ai e quan “vendim pa pendim” — pra, të jeni të lumtur që e keni provuar, edhe nëse nuk keni arritur sukses. Për ta bërë këtë, ai sugjeron t’i bëni vetes dy pyetje për të vlerësuar nivelin tuaj të bindjes dhe gatishmërinë financiare për një ndërmarrje të re.
Pyetja e parë është nëse keni arritur ta zhvilloni idenë e biznesit tuaj deri në pikën ku mendoni se ia vlen të rrezikoni dhe të lini punën. Mendoni sa shumë besoni në atë biznes — jo vetëm për atë që mund të bëhet në të ardhmen, por edhe për atë që është aktualisht. Reflektoni mbi qëllimet konkrete që keni — nga të ardhurat, numri i klientëve, deri te lloji i tyre. Në të njëjtën kohë, jini realistë për sa e arritshme është ideja juaj.
Sipas Shah, nëse e dini çfarë kërkohet për ta mbajtur dhe zhvilluar atë biznes, dhe jeni të bindur se ka mundësi reale suksesi, atëherë ky është një hap i parë i rëndësishëm.
Pyetja e dytë është më personale dhe më pragmatike — a jeni në një pozitë financiare që mund t’ju lejojë të merrni rrezikun? Kjo pyetje lidhet me atë që ka folur edhe biznesmeni amerikan Mark Cuban.
“Fillimisht kurseni para. Mos jepni dorëheqjen nga puna pa e ditur çfarë po bëni. Dëgjojmë shumë histori për njerëz që kanë lënë punën, kanë krijuar kompaninë e tyre dhe janë pasuruar. Ajo që nuk e dëgjojmë janë historitë e atyre që lanë punën, themeluan një kompani dhe dështuan keq, dhe tani e urrejnë atë që bëjnë”, tha Cuban për gazetën amerikane Wired në vitin 2023.
Ekspertët e planifikimit financiar rekomandojnë të kurseni mjaftueshëm para për të mbuluar shpenzimet personale dhe të biznesit për 12 muaj përpara se të jepni dorëheqjen, në mënyrë që të mund ta drejtoni biznesin tuaj pa presion. Cuban rekomandon të keni të paktën gjashtë muaj shpenzime jetese të kursyera.
Nëse nuk mund t’i përballoni ju dhe familja juaj rrethanat më të këqija, siç paralajmëron Shah, atëherë me gjasë nuk jeni ende gati. Ai përmendi një hua ose ndihmën nga një person i afërt si mënyra alternative për të arritur përgatitjen financiare. Për më tepër, nëse ende nuk jeni gati, ai sugjeron të përpiqeni të negocioni me punëdhënësin tuaj aktual për të përmirësuar pozicionin tuaj të punës. Siç përfundoi ai, një gjë është e sigurt — ai vetë nuk do të linte punën e tij shumë shpejt, shkruan CNBC.
Përgatiti dhe përmblodhi:
WWW.STUDENTET.MK
