Kur Steve Jobs mori përsëri kontrollin e Apple në vitin 1997, ai nuk krijoi një strategji të re me 50 pika. Ai bëri diçka shumë më të thjeshtë, e reduktoi kompaninë në katër produkte. Mësimi është i vlefshëm edhe sot: nëse përpiqeni të bëni gjithçka, ka shumë mundësi që të mos jeni duke bërë atë që është më e rëndësishme.
Kur Steve Jobs u kthye në Apple në vitin 1997, e gjeti kompaninë përballë një problemi të madh: po bënte shumë gjëra.
Apple kishte një numër të madh produktesh, modele të ndryshme kompjuterësh dhe shumë projekte që konsumonin kohë, para dhe njerëz. Ndërkohë, kompania po e humbiste gjithnjë e më shumë drejtimin e saj.
Në vend që të shtonte edhe një strategji, një produkt tjetër apo një objektiv të ri, Jobs bëri të kundërtën.
Ai mblodhi ekipin drejtues dhe vizatoi një matricë të thjeshtë. Në njërin bosht ishin “Consumer” dhe “Pro”, ndërsa në tjetrin “Desktop” dhe “Portable”.Katër fusha. Ideja ishte e thjeshtë: Apple duhej të krijonte nga një produkt të shkëlqyer për secilën prej këtyre katër fushave. Gjithçka tjetër mund të ndryshonte. Ky ishte një nga hapat e parë me të cilët Jobs filloi ta rifokusonte kompaninë.
Dhe pikërisht këtu qëndron një nga mësimet më të rëndësishme për biznesin që mund ta zbatojmë edhe sot: Fokusi nuk është aftësia për të bërë shumë gjëra. Fokusi është aftësia për të vendosur se çfarë të mos bësh.
Fjala më e vështirë në biznes është “jo”
Jobs dikur tha se “inovacioni është t’u thuash jo një mijë gjërave”. Ky është një aspekt shumë më i vështirë i inovacionit sesa duket. Sepse “po” është e këndshme. “Po” do të thotë mundësi e re, projekt i ri, klient i ri, ide e re. “Jo” do të thotë heqje dorë. Dhe pikërisht kjo heqje dorë shpesh bën dallimin mes njerëzve dhe kompanive që janë thjesht të zënë dhe atyre që vërtet përparojnë.
Problemi në botën moderne të biznesit nuk është mungesa e mundësive. Përkundrazi,kemi shumë prej tyre. Kemi dhjetëra email-e që presin përgjigje, pesë takime, tre projekte, një ide të re, mesazhe në disa aplikacione, rrjete sociale dhe edhe dhjetë gjëra të tjera që “do të ishte mirë” të bëheshin. Në fund të ditës mund të jemi të rraskapitur pa e bërë punën më të rëndësishme. Prandaj mësimi i Jobs është në fakt shumë i thjeshtë: Nëse i thoni “po” çdo gjëje, gjërat tuaja më të rëndësishme nuk do të kenë prioritet.
Apple nuk u bë më e mirë duke bërë më shumë
Një nga keqkuptimet më të mëdha në biznes është se rritja lidhet me numrin e gjërave që bën një kompani. Më shumë produkte. Më shumë takime. Më shumë tregje. Më shumë punonjës. Më shumë projekte. Por ndonjëherë është pikërisht e kundërta. Kur Jobs mori drejtimin e kompanisë, ai nuk u përpoq të rregullonte të gjitha produktet që ekzistonin. Ai nuk krijoi një listë me 100 prioritete. Ai e reduktoi numrin e prioriteteve. Ky është një ndryshim i madh, sepse nëse keni 20 prioritete, në të vërtetë nuk keni prioritete. Keni një listë me gjithçka që dëshironi të bëni.
Një prioritet i vërtetë kërkon zgjedhje, ndërsa zgjedhja nënkupton se diçka tjetër duhet të presë.
Si ta aplikoni metodën e Jobs
Nuk është e nevojshme të përdorni modelin e Apple për ta zbatuar këtë parim. Thjesht shikoni listën tuaj të detyrave dhe krijoni versionin tuaj të “katër fushave”.
Bëjini vetes dy pyetje:
- Çfarë është më e rëndësishme për mua tani?
- Cila nga gjërat që po bëj nuk është vërtet e nevojshme?
Pastaj përpiquni t’i kufizoni objektivat tuaja në disa kategori kryesore. Nëse drejtoni një ekip, ato mund të jenë zhvillimi i produkteve, klientët, njerëzit dhe financat. Nëse jeni sipërmarrës, mund të jenë shitjet, produkti, zhvillimi dhe përdoruesit. Nëse punoni me objektiva personale, ato mund të jenë puna, familja, shëndeti dhe studimet. Qëllimi nuk është domosdoshmërisht të keni katër kategori.
Qëllimi është të kufizoni numrin e gjërave që kërkojnë vëmendjen tuaj në të njëjtën kohë.
Nuk duhet t’u jepni mundësi të gjithëve
Një tjetër mësim nga Jobs është veçanërisht i rëndësishëm për karrierën. Jo çdo ide e mirë duhet të bëhet projekti juaj. Jo çdo mundësi duhet të bëhet përgjegjësia juaj. Nuk është e nevojshme të zhvillohet çdo takim. Nuk duhet t’i përgjigjeni menjëherë çdo email-i dhe nuk është e nevojshme të arrini çdo objektiv në të njëjtën kohë. Kjo nuk është dembelizëm. Është zgjedhje.
Njerëzit më produktivë nuk janë domosdoshmërisht ata që mund të bëjnë më shumë gjëra brenda një dite. Shpesh janë ata që dinë më mirë të vlerësojnë çfarë nuk duhet të bëjnë fare.
Krijoni një “listë të gjërave për të mos bërë”
Për të filluar, merrni gjithçka me të cilën po merreni aktualisht, projekte, takime, detyrime, ide dhe plane. Pastaj ndajini në tri grupe:
DUHET – gjëra që ndikojnë drejtpërdrejt në objektivin tuaj më të rëndësishëm.
MUND – gjëra që janë të dobishme, por jo thelbësore.
JO – gjëra që i bëni vetëm sepse jeni mësuar me to, sepse të gjithë të tjerët i bëjnë ose sepse ju vjen keq të thoni “jo”.
Grupi i tretë është më i rëndësishmi. Zakonisht aty fshihet pjesa më e madhe e energjisë që mund t’ia riktheni vetes. Sepse fokusi nuk ka të bëjë me shtimin e një tjetër teknike produktiviteti në një listë detyrash që tashmë është e mbingarkuar. Fokusi ka të bëjë me pastrimin e asaj liste.Steve Jobs nuk u përpoq të gjente edhe 50 gjëra të tjera që Apple duhej të bënte. Fillimisht, ai vendosi se çfarë Apple nuk do të bënte më.
Përgatiti dhe përshtati:
WWW.STUDENTËT.MK
